ყველაფერი ერთ სივრცეში- საჯარო და კერძო სექტორის 500-მდე სერვისი
იუსტიციის სახლი საქართველოს იუსტიციის სამინისტროს დაქვემდებარებაში მყოფი საჯარო სამართლის იურიდიული პირია, რომელიც გასცემს საჯარო და კერძო სექტორის 500-მდე სერვისს.
იუსტიციის სახლი ეფუძნება კონცეფციას ,,ყველაფერი ერთ სივრცეში“, რაც გულისხმობს მომხმარებელთა მომსახურებას ერთი ფანჯრის პრინციპით, კომფორტულ გარემოში, მარტივი პროცედურებით, სწრაფად და მაღალი ხარისხით.
იუსტიციის სახლს 3 მიზანი აქვს:
მომხმარებლისათვის, სახელმწიფო და კერძო სექტორის სერვისების მაღალი ხარისხით მიწოდება;
სახელმწიფო და მუნიციპალური მომსახურებების განვითარების ხელშეწყობა;
მომხმარებლისთვის მრავალფეროვანი მომსახურებების, ახალი და ინოვაციური, მათ შორის, იუსტიციის სახლის საკუთარი სერვისების შეთავაზება; მომსახურების მიწოდების სხვადასხვა არხების შექმნით სერვისებზე ხელმისაწვდომობის გაზრდა.
თანამედროვე და ინოვაციური გადაწყვეტები
იუსტიციის სახლი ადამიანის სახელმწიფოსთან ურთიერთობის პოზიტიურ გამოცდილებას ქმნის, რისთვისაც იყენებს სხვადასხვა ინოვაციურ გადაწყვეტას. იუსტიციის სახლის ფილიალებში მომსახურების სივრცე იყოფა 3 ძირითად ნაწილად: თვითმომსახურების, სწრაფი მომსახურებისა და ხანგრძლივი მომსახურების სივრცეებად. ამგვარმა განაწილებამ შესაძლებელი გახადა მინიმუმამდე შემცირებულიყო ხანგრძლივი რიგის წარმოქმნის ალბათობა და ლოდინის პერიოდი. სერვისის მიღების მსურველთა თანმიმდევრობას სპეციალურად ინტეგრირებული რიგის მართვის ელექტრონული სისტემა არეგულირებს, რომელიც რიგის შემსუბუქებასა და ხელმისაწვდომობის ზრდას ემსახურება. იუსტიციის სახლში, მაღალი ხარისხის მომსახურების შესათავაზებლად, დანერგილია ისეთი ინოვაციები, როგორებიც არის პასპომატი, Just Cafe, ProbBox და ქორწინების სახლი.
საჯარო სერვისების ხელმისაწვდომობის გაზრდის მიზნით, შეიქმნა პროექტი მობილური იუსტიციის სახლი, რომელიც სახლთან ახლოს ემსახურება გამყოფი ხაზის მიმდებარე სოფლებში, მაღალმთიან დასახლებებსა და იუსტიციის სახლებიდან მოშორებით მცხოვრებ მოსახლეობას. იუსტიციის სამინისტროში ამოქმედდა გლობალური ინოვაცია- იუსტიციის სახლი პენიტენციურ დაწესებულებებში, რომელიც გულისხმობს ბრალდებულების, მსჯავრდებულებისა და სისტემის თანამშრომლებისთვის მომსახურების ადგილზე მიწოდებას.
იუსტიციის სახლში 24/7-ზე საქართველოსა და უცხო ქვეყნის მოქალაქეებს ემსახურება სატელეფონო ცენტრი. ორგანიზაციის ბაზაზე შექმნილია ქორწინების სახლები, რომელთა სერვისი მსოფლიოში ერთ-ერთი ყველაზე სწრაფია. ქორწინების რეგისტრაციით, საქართველოს მოქალაქეებთან ერთად, აქტიურად სარგებლობენ უცხო ქვეყნის მოქალაქეები და აღნიშნული მომსახურება საქართველოში საქორწილო ტურიზმის ინდუსტრიის განვითარების ერთ-ერთი მთავარი ფაქტორი გახდა.
შშმ პირთა მომსახურება
იუსტიციის სახლი მომსახურების მიმწოდებელი პირველი დაწესებულებაა საქართველოში, სადაც შეზღუდული შესაძლებლობის მქონე პირების მომსახურების სტანდარტი დაინერგა. შემუშავდა სახელმძღვანელო დოკუმენტი, რომლითაც იუსტიციის სახლებში შეზღუდული შესაძლებლობის მქონე პირების მომსახურების პროცესი იმართება. სპეციალურად იუსტიციის სახლის სერვისებზე წვდომისათვის, ყრუ და სმენადაქვეითებული მოქალაქეებისთვის შეიქმნა ახალი ჟესტები 400 ტერმინისათვის. ჟესტური ენა შეისწავლა იუსტიციის სახლის 200-ზე მეტმა თანამშრომელმა, რომლებიც ყრუ პირებს თარჯიმნის გარეშე ემსახურებიან. 750 თანამშრომელი გადამზადდა შეზღუდული შესაძლებლობის მქონე პირთა ეფექტიანი მომსახურებისა და კომუნიკაციის მიმართულებით. უსინათლო და მცირემხედველი პირებისთვის ადაპტირებულია იუსტიციის სახლის ვებ გვერდი.
იუსტიციის სახლის თბილისის ცენტრალური ფილიალი სრულად ადაპტირებულია მცირემხედველი და უსინათლო პირებისთვის. შენობის შიდა და გარე პერიმეტრზე განთავსებულია ტაქტილური ბილიკები, მიმართულების მანიშნებელი სადგამები ბრაილის წარწერებით, სანავიგაციო ტაქტილური რუკები, ოთახის მანიშნებლები ბრაილის წარწერებით, მანიშნებლები შენობაში არსებულ კიბეებსა და მინებზე. ტაქტილური ბილიკები განთავსებულია 10 ქალაქში არსებულ იუსტიციის სახლში. ეტაპობრივად ხორციელდება იუსტიციის სახლის ფილიალების ადაპტირება შშმ პირთა საჭიროებებზე. იუსტიციის სახლის ფილიალები აღჭურვილია შშმ პირთა ეტლებით.
იუსტიციის სახლი რიცხვებში
იუსტიციის სახლის მომსახურებით, მთელი საქართველოს მასშტაბით მოქმედ 127 ფილიალსა და 20 მობილურ იუსტიციის სახლში, ყოველდღიურად 20 000-ზე მეტი მომხმარებელი სარგებლობს. სატელეფონო ცენტრი ყოველდღიურად 5000-მდე ადამიანს უწევს კონსულტაციას. იუსტიციის სახლი 16 საჯარო და 31 კერძო ორგანიზაციის სერვისებს გასცემს. მუდმივად ინერგება ახალი მომსახურება, რისთვისაც პერმანენტულად ტარდება მომხმარებელთა საჭიროებების კვლევა.
ხარისხის მართვა
იუსტიციის სახლი რეგიონში პირველი საჯარო დაწესებულებაა, რომელმაც დანერგა ევროკავშირში შექმნილი ორგანიზაციული თვითშეფასების ერთიანი სისტემა- CAF. შემუშავდა სამოქმედო გეგმაც, რომელიც განსახორციელებელ ქმედებებთან ერთად საკითხების გაუმჯობესებაზე პასუხიმგებელ პირებსა და ვადებს განსაზღვრავს. იუსტიციის სახლის სანდოობის მაღალ ხარისხს მომხმარებელთა კმაყოფილების კვლევში დაფიქსირებული 95% ადასტურებს. მომსახურების ხარისხის მუდმივი გაუმჯობესების მიზნით მოქმედებს უკუკავშირის პლატფორმები, რომლებზეც მომხარებლებს მიღებული სერვისის შესახებ მოსაზრებისა თუ რჩევების გაზიარების შესაძლებლობა აქვთ.
იუსტიციის სახლი აგრძელებს ინოვაციების დანერგვას სერვისის ხარისხის მუდმივი გაუმჯობესებისთვის.
